ڪوٽڙي ۾ ڪي بي فيڊر مان پاڻي کڻت بند، بحران ٿي ويو، ڊي سي غيرقانوني فراهمي جي اجازت گھري ورتي

ڪوٽڙي(رپورٽ:يوسف سارنگ) ڪوٽڙي شهر ۾ پاڻي جو بحران شديد ٿي ويو آهي. ان ڏس ۾ ڊپٽي ڪمشنر ڄامشورو رياض حسين وساڻ عدالتي حڪم تي ڪي بي فيڊر تي غيرقانوني طور تي پاڻي کڻڻ لاءِ لڳايل مشينون بند ڪرائي رپورٽ سول جج ڄامشوري جي عدالت ۾ جمع ڪرائي ڇڏي آهي. ڊي سي ڄامشورو عدالت ۾ جمع ڪرايل رپورٽ ۾ ڄاڻايو آهي ته ڪي بي فيڊر تي 12 غيرقانوني واٽر هائيڊرنٽ ذريعي پاڻي کنيو پئي ويو، جن کي بند ڪرائي مشينون کڻايون ويون آهن. رپورٽ ۾ وڌيڪ چيو ويو آهي ته ٻولهاڙي ميونسپل ڪاميٽيءَ سميت ڄامشورو ٽائون ڪاميٽي جي اڪثر علائقن ۾ لائينن ذريعي پاڻيءَ جي فراهمي نه ٿي رهي آهي، جنهنڪري پبلڪ هيلٿ انجنيئرنگ کاتي کي ميونسپل ڪاميٽي ٻولهاڙيءَ ۾ ميگا واٽر سپلاءِ اسڪيم ڏيڻ جي سفارش ڪئي وئي آهي. رپورٽ ۾ ٻولهاڙي ميونسپل ڪاميٽيءَ جي چيف ميونسپل آفيسر جو حوالو ڏئي ڄاڻايو ويو آهي ته ٻولهاڙي ميونسپل جي آبادي هڪ لک 69 هزار 613 انسانن مان وڌي اٽڪل اڍائي لک تائين پهچي وئي آهي، تنهنڪري واٽر سپلاءِ جي موجوده سسٽم ذريعي سڄي آباديءَ کي پاڻي فراهم ڪرڻ ممڪن ناهي. رپورٽ ۾ عدالت کي چيو ويو آهي ته واٽر هائيڊرنٽ مڪمل طور تي بند ڪرڻ سان ميونسپل ڪاميٽي ٻولهاڙيءَ ۾ پاڻيءَ جو بحران وڌيڪ سنگين ٿي ويندو، تنهنڪري سڄي آباديءَ تائين پاڻيءَ جي فراهمي يقيني بڻجڻ تائين رات جي وقت ٽينڪرن ذريعي پاڻيءَ جي فراهمي جاري رکڻ ۽ ٽينڪرن جا گهٽ ۾ گهٽ اگھ مقرر ڪرڻ جي اجازت ڏني وڃي.

بند پيل ٽن واٽر سپلاءِ اسڪيمن کي فوري فعال ڪري لائينن ذريعي پاڻي فراهم ڪيو وڃي: رهواسي

ڪوٽڙي: ميونسپل ڪاميٽي ٻولهاڙيءَ جي سڄاڻ ڌرين خالد لاشاري، اعجاز سومرو، لونگ ملاح، قادر آزاد پنهور، عبدالرحمان جانوري، مرتضيٰ رند، برڪت گهوٽو، محرم خاصخيلي ۽ ٻين چيو آهي ته ڊي سي ڄامشورو سميت اختيارين کي ميونسپل ڪاميٽي ٻولهاڙيءَ ۾ بند پيل ٽن واٽر سپلاءِ اسڪيمن کي فوري طور تي فعال ڪري رهواسين کي لائينن ذريعي پاڻي فراهم ڪرڻ گهرجي.