ممبئي (شوبز نيوز) بالي ووڊ جي خوبرو اداڪارا ديشا پٽاني جو پيءُ رٽائرڊ ڊي ايس پي جگديش سنگهه پٽاني مبينا طور 25 لک رپين جي فراڊ جو شڪار ٿي ويو. پرڏيهي ميڊيا رپورٽس موجب، پنجن جوابدارن جي هڪ گروپ کيس سرڪاري ڪميشن ۾ اعليٰ عهدو ڏيارڻ جو ڏٽو ڏئي کائنس ڄاڻايل رقم هڙپ ڪري ورتي. ميڊيا رپورٽس موجب، واقعي جو ڪيس بريلي جي ڪوتوالي پوليس اسٽيشن ۾ داخل ڪيو ويو آهي، نامزد جوابدارن خلاف فراڊ، ڌمڪيون ڏيڻ ۽ جبري وصولي جي الزامن هيٺ ڪيس داخل ڪيو ويو آهي. ايف آءِ آر جي متن موجب، اداڪارا جي پيءُ کان پنج لک رپيا روڪ ۽ ويهه لک رپيا ٽن مختلف بئنڪ اڪائونٽس ۾ ٽرانسفر ڪرايا ويا پر کيس ڪو به اعليٰ عهدو نه مليو.
