بنا جواز الزامن کان پاسو ڪيو وڃي:بابر يعقوب

اسلام آباد:(بيورو) قومي اسيمبلي جي اسپيڪر سردار اياز صادق سومر ڏينهن اليڪشن ڪميشن جي سيڪريٽري بابر يعقوب کي چيو ته هو وسيع تر قومي مفادن خاطر چونڊ سڌارن لاءِ قائم پارلياماني ڪميٽي جي اجلاسن ۾ پنهنجي شرڪت کي يقيني بڻائي. قومي اسيمبلي جي اسپيڪر سان ٽيليفون تي ڳالهائيندي اليڪشن ڪميشن جي سيڪريٽري چيو ته اليڪشن ڪميشن هڪ آئيني ادارو آهي، ان لاءِ اداري ۽ سندس آفيسرن جي احترام کي نظر ۾ رکيو وڃي ۽ بنا جواز الزامن کان پاسو ڪيو وڃي. هن چيو ته اسان لاءِ سمورا پارليامينٽرينز احترام لائق آهن تنهن ڪري اليڪشن ڪميشن ۽ ان جي آفيسرن جي عزت جو به خيال رکيو وڃي. هن اسپيڪر کي خاطري ڪرائي ته هو لاڳاپيل آفيسرن سان گڏجي چونڊ سڌارن واري ڪميٽي جي اجلاسن ۾ نه رڳو شرڪت ڪندو پر سمورو آئيني ۽ قانوني سهڪار پڻ جاري رکندو.